ეკონომიკისა და მდგრადი განვითარების მინისტრი ნათია თურნავა, ქვემო ქართლში სახელმწიფო რწმუნებული შოთა რეხვიაშვილი და საქართველოს გაზის ტრანსპორტირების კომპანიის გენერალური დირექტორი, მიხეილ შალამბერიძე, ცენტრალური და ადგილობრივი ხელისუფლების წარმომადგენლებთან ერთად, თეთრიწყაროს მუნიციპალიტეტის დაბა მანგლისში მიმდინარე გაზიფიცირების სამუშაოებს გაეცნენ და მოსახლეობას შეხვდნენ.

დაბა მანგლისში, სადაც ადგილობრივებს ბუნებრივი აირით სარგებლობის შესაძლებლობა, ამ დრომდე არასოდეს ქონიათ, საქართველოს გაზის ტრანსპორტირების კომპანია, მთავრობის შესაბამისი განკარგულების საფუძველზე, მასშტაბურ სამუშაოებს ახორციელებს. აშენდება 34 150 გრძივი მეტრი მკვებავი და ქსელის მოწყობისათვის საჭირო 48 273 გრძივი მეტრი გაზსადენი. 1 558 აბონენტს საშუალება მიეცემა ისარგებლოს ბუნებრივი გაზით. სამუშაოების ღირებულება 11 მილიონ 500 ათასი ლარია.

აღსანიშნავია, რომ 2019-2021 წლების გაზიფიცირების მასშტაბური გეგმის ფარგლებში, გაზიფიცირდება 384 დასახლებული პუნქტი, რომელიც 88 363 აბონენტს მოიცავს. აღნიშნულისთვის 270 მილიონი ლარი დაიხარჯება. სამწლიანი გეგმით, ქვემო ქართლის რეგიონში, 29 დასახლებული პუნქტის გაზიფიცირებაა გათვალისწინებული.

ხელისუფლების წარმომადგენლებმა, მოსახლეობასთან საუბრისას მანგლისის დიდი ტურისტული პოტენციალისა და ადგილობრივების მიერ, სახელმწიფო საგრანტო პროგრამებით სარგებლობის მნიშვნელობაზე გაამახვილეს ყურადღება.