ქვემო ქართლის გუბერნატორი, რეგიონის მასშტაბით, მოსახლეობასთან შეხვედრებს აქტიურად განაგრძობს. გრიგოლ ნემსაძე ამჯერად თეთრიწყაროს მუნიციპალიტეტის სოფელ ქოსალარის მცხოვრებლებს შეხვდა. 

მხარის გუბერნატორმა, ადგილობრივ მცხოვრებლებს, სოფელში საგზაო ინფრასტრუქტურის მიმართულებით დაგეგმილი სიახლეები გააცნო, რომელიც ადგილზე მიმდინარე წელს განხორციელდება. 

ინფრასტრუქტურული პროექტის ფარგლებში მოასფალტდება საავტომობილო გზა, პროექტი ხორციელდება სახელმწიფო ბიუჯეტის თანადაფინანსებით. შედეგად სოფელში მცხოვრები 800-მდე ბენეფიციარი ისარგებლებს უსაფრთხო და კომფორტული გადაადგილების პირობით. პროექტის ღირებულება შეადგენს 2 011 457 ლარს.

შეხვედრის მიმდინარეობისას, ადგილობრივმა მცხოვრებლებმა, მათ მიერ დასმულ კითხვებზე პასუხი უშუალოდ გუბერნატორისგან მოისმინეს და არსებული პრობლემების მოგვარების გზები ერთობლივად დასახეს. 
ქოსალარის მოსახლეობამ გრიგოლ ნემსაძესა და ადგილობრივი ხელისუფლების წარმომადგენლებს აქტიური და ნაყოფიერი საქმიანობისთვის მადლობა გადაუხადა. 

აღსანიშნავია, რომ 2018 წელს თეთრიწყაროს მუნიციპალიტეტში ადგილობრივი ბიუჯეტით დაგეგმილია 10 ინფრასტრუქტურული პროექტის განხორციელება, სავარაუდო ჯამური ღირებულებით 866 100 ლარი.

რეგიონებში განსახორციელებელი პროექტების ფონდიდან ამ ეტაპზე დაფინანსებულია 5 პროექტი ქ. თეთრიწყაროს შიდა ქუჩები და სოფლებში ახალშენი, მაწევანი და ქოსალარში მისასვლელი გზები - ჯამური ღირებულებით 1 996 747 ლარი.