ქვემო ქართლის რეგიონში მრავალპროფილური პროფესიული სასწავლებელი აშენდება

გიორგი დოხტურიშვილი საგანმანათლებლო და სამეცნიერო ინფრასტრუქტურის განვითარების სააგენტოს დირექტორთან, ლევან სუხიტაშვილთან, ბოლნისის, დმანისის, თეთრიწყაროსა და წალკის მაჟორიტარ-დეპუტატთან, გოგი მეშველიანთან და ბოლნისის მუნიციპალიტეტის მერთან, დავით შერაზადიშვილთან ერთად მიმდინარე სამუშაობს ადგილზე გაეცნო.

,,აუცილებელია, ადგილობრივ მოსახლეობას შევუქმნათ შესაბამისი საგანმანათლებლო პირობები. ახალგაზრდებმა უნდა შეძლონ რეგიონში გამართულ, თანამედროვე სტანდარტების მქონე ინფრასტრუქტურაში საჭირო ცოდნისა და გამოცდილების მიღება. ბოლნისის მუნიციპალიტეტში მიმდინარე პროფესიული კოლეჯის სამშენებლო სამუშაოები, სრულად 2024 წლის ბოლოს დასრულდება. პროექტის დასრულების შემდეგ, პროფესიულ კოლეჯში, 150 მოსწავლე შეძლებს სხვადასხვა საგანმანათლებლო პროგრამაზე სწავლას. პროექტის სრული ღირებულება შეადგენს 6, 700 000 ლარს“- განაცხადა შეხვედრის დროს სახელმწიფო რწმუნებულმა.

პროფესიულ სასწავლებელში მოეწყობა:

თეორიული სწავლების აუდიტორიები; ბიბლიოთეკა; ადმინისტრაციული სივრცე; საკონფერენციო და სადემონსტრაციო დარბაზები;

შენობა აღჭურვილი იქნება გათბობა-გაგრილებისა და ვენტილაციის ცენტრალური სისტემით;

სასწავლებელი სრულად იქნება ადაპტირებული შეზღუდული შესაძლებლობების მქონე პირთათვის: მოეწყობა პანდუსები, ლიფტი და ადაპტირებული სველი წერტილები;

სასწავლებლის ეზოში განთავსდება ღია სპორტული მოედანი; მოეწყობა გამწვანებული რეკრეაციული სივრცეები; ტრენაჟორებით აღჭურვილი სავარჯიშო სივრცე; მოასფალტებული გზები და ავტოსადგომი.

მშენებლობა, საქართველოს განათლებისა და მეცნიერების სამინისტროს დაფინანსებით, სსიპ-საგანმანათლებლო და სამეცნიერო ინფრასტრუქტურის განვითარების სააგენტო ახორციელებს.