პირველად, ქვემო ქართლის რეგიონში, ა(ა)იპ „სპორტის მართვის მეთოდოლოგიის და ტექნოლოგიების ასოციაცია“, ქვემო ქართლში სახელმწიფო რწმუნებულის და საქართველოს ფეხბურთის ფედერაციის მხარდაჭერით, კამპანია „როდესაც სპორტი ცვლის სამყაროს“ ფარგლებში, „სასკოლო სპორტულ ლიგას“ ჩაატარებს.

2 მაისს, სართიჭალაში მინი ფეხბურთში ,,ქვემო ქართლის სასკოლო ლიგა 2023-ის“ პროექტის კენჭისყრა და პრეზეტაცია გაიმართა. ღონისძიებას ქვემო ქართლის სახელმწიფო რწმუნებულის მოადგილე ნიკა კობახიძე და მუნიციპალიტეტის წარმომადგენლები ესწრებოდნენ.

ქვემო ქართლში სასკოლო ლიგა წელს პირველად საპილოტე რეჟიმში ჩატარდება და მასში სხვადასხვა მუნიციპალიტეტის 20 სკოლა, ხუთ ქვეჯგუფში მიიღებს მონაწილეობას.

2023 სასწავლო წლის სეზონისთვის სასკოლო ლიგის ტურნირი ქვემო ქართლის რეგიონის ექვს მუნიციპალიტეტს მოიცავს. რეგიონში გამარჯვებული გუნდი კი საქართველოს მასშტაბით რეგიონებიდან გამარჯვებულ გუნდებს შეხვდება.

სასკოლო ლიგის ტურნირი ხელს შეუწყობს ინოვაციური მეთოდების გამოყენებასა და მოტივაციის ამაღლებას, ასევე რეგიონში როგორც სასკოლო სპორტის, ისე მასობრივი და პროფესიული სპორტის განვითარებას და ჯანსაღი ცხოვრების წესის პოპულარიზაციას.