ქვემო ქართლში სახელმწიფო რწმუნებულმა, შოთა რეხვიაშვილმა, გარდაბნისა და დმანისის მუნიციპალიტეტების ხელმძღვანელ პირებთან ერთად, კომპანია ,,აგროკომპლექსი“-ს მიერ, სოფელ სართიჭალაში, სასოფლო-სამეურნეო მიმართულებით განხორციელებული სამუშაოები დაათვალიერა, რომელიც მარცვლოვან კულტურებს, ინტენსიური ვაშლის ბაღებსა და საქონლის მეხორცული ჯიშის ფერმას მოიცავს.

,,აგროკომპლექსი“ ქვემო ქართლის რეგიონში საქმიანობას, გარემოს დაცვისა და სოფლის მეურნეობის სამინისტროს შეღავათიანი აგროკრედიტის თანადაფინანსებითა და სამხარეო ადმინისტრაციის ხელშეწყობით ახორციელებს. კომპლექსის ტერიტორიაზე, 700 ჰექტარზე მარცვლოვანი კულტურაა გაშენებული, 30 ჰექტარზე ინტენსიური ვაშლის ბაღები, ადგილზე მოწყობილია ფრანგული მეხორცული ჯიშის მეცხოველეობის ფერმა. ასევე სახელმწიფო პროგრამების ხელშეწყობით მიმიდნარეობს საერთაშორისო სტანდარტების შესაბამისი, 1000 ტონა პროდუქტზე გათვლილი, სამაცივრე კომპლექსის მშენებლობა. კომპანიაში ამ ეტაპზე 40 ადგილობრივია დასაქმებული.

აღსანიშნავია, რომ ,,აგროკომპლექსი“ პროდუქციის ძირითადი ნაწილის რეალიზებას კომპანია ,,ჩირინაში“ აწარმოებს.

,,აგროკომპლექსი“ საქმიანობის გაფართოებას რეგიონის მასშტაბით გეგმავს - კომპანიის დირექტორმა ლაშა ჯინჭარაძემ, მხარისა და ადგილობრივი ხელისუფლების წარმომადგენლებს, დმანისის მუნიციპალიტეტში, ფრანგ ინვესტორებთან ერთად დაგეგმილი პროექტი გააცნო, რომელიც ადგილზე, მეცხოველეობის საჩვენებელი კომპლექსის მოწყობას ითვალისწინებს.