ქვემო ქართლში სახელმწიფო რწმუნებულმა, რუსთავში მცხოვრებ წარმატებულ პედაგოგებსა და საერთაშორისო სამხატვრო კონკურსში გამარჯვებულ მოსწავლეებს, 8 მარტი მიულოცა და სადღესასწაულო საჩუქრები გადასცა. 

შოთა რეხვიაშვილი, ქალაქის მერთან ერთად, პირადად იმყოფებოდა ვიქტორია ლებედევასთან, რომელიც ორ ათეულ წელზე მეტია რუსთაველ ახალგაზრდებს მხატვრულ აკრობატიკას ასწავლის. ასევე იმყოფებოდა მე-11 საჯარო სკოლის დაწყებითი კლასის პედაგოგთან, ლედი კიწმარიშვილთან, რომელიც პროფესიულ საქმიანობას 2 წელია ეწევა და უკვე უფროსი მასწავლებლის სტატუსის მქონეა. 

მხარისა და ქალაქის ხელმძღვანელმა პირებმა, ქალთა საერთაშორისო დღე მიულოცეს სამხატვრო სკოლის ხელმძღვანელს, დარეჯან ნოზაძესა და მის წარმატებულ მოსწავლეებს, დაკო ქავთარაძეს, ლილი ლაჩაშვილსა და ბარბარე ვარამაშვილს, რომლებმაც გერმანიის გარემოს დაცვითი კავშირის მიერ ორგანიზებულ კონკურსში საპრიზო ადგილები მოიპოვეს. სამხატვრო სალონში სტუმრობისას სახელმწიფო რწმუნებულმა, პატარა მხატვრებთან ერთად, სამახსოვრო ნამუშევარი შექმნა. 

დღესვე, შოთა რეხვიაშვილი თემატურ ღონისძიებას დაესწრო გარდაბნის მუნიციპალიტეტშიც, სადაც, ადგილობრივი ხელისუფლების წარმომადგენლებთან ერთად, ღვაწლმოსილ და დამსახურებულ ქალბატონებს გაზაფხულის დღესასწაულები მიულოცა.