ქალაქ რუსთავში, მუნიციპალური სერვისების ცენტრი გაიხსნა.

პროექტი, რუსთავის მერიაში მიმდინარე მუნიციპალური სერვისების რეფორმის ფარგლებში, USAID-ის ადგილობრივი თვითმმართველობების პროგრამის მხარდაჭერით განხორციელდა.

რეფორმირებული სერვისების და მოქალაქეთა მომსახურების ახალი ცენტრის პრეზენტაცია რუსთავის მერმა, ნინო ლაცაბიძემ წარადგინა. პრეზენტაციას ქვემო ქართლში სახელმწიფო რწმუნებული, გიორგი დოხტურიშვილი, საქართველოს პარლამენტის თავმჯდომარე, შალვა პაპუაშვილი, რუსთავისა და გარდაბნის ათი თემის მაჟორიტარი დეპუტატი, ირაკლი შატაკიშვილი, USAID-ის მისიის ხელმძღვანელის მოვალეობის შემსრულებელი საქართველოში, ჯუნიპერ ნილი, რუსთავის საკრებულოს ფრაქცია ,,ქართული ოცნების“ დეპუტატები და სხვა მოწვეული სტუმრები ესწრებოდნენ.

ახალ ცენტრში, რუსთაველები ყველა მუნიციპალური სერვისით, ერთ კომფორტულ და თანამედროვე სივრცეში შეძლებენ სარგებლობას, სადაც მოქალქეებს უნივერსალური ოპერატორები მოემსახურებიან.

დაწესებულება აღჭურვილია ყველა საჭირო ტექნიკით და ადაპტირებულია შეზღუდული შესაძლებლობების მქონე პირთათვის.

სერვისცენტრში ერთად იქნება თავმოყრილი აბსოლუტურად ყველა სახის მომსახურება, რასაც მუნიციპალიტეტი სთავაზობს მოქალაქეებს იქნება ეს, სოციალური, არქიტექტურული, ინფრასტრუქტურული, კორპუსის კეთილმოწყობის თუ სხვა სახის პროგრამები. უნდა აღინიშნოს, რომ მოქალაქეებს უნივერსალური ოპერატორების გარდა, მითერ კონსულტანტები, მუნციპალიტეტის სხვადასხვა სამსახურის და მერიის წარმომადგენლებიც გაუწევენ საჭირო კონსულტაციას.

პრეზენტაციის ბოლოს, რუსთავის მერმა, ნინო ლაცაბიძემ და დასაქმების ხელშეწყობის სახელმწიფო სააგენტოს ხელმძღვანელის მოადგილემ, ზურაბ მენთეშაშვილმა მემორანდუმი გააფორმეს, რის საფუძველზეც, ახალ მუნიციპალურ სერვისცენტრში კიდევ ერთი სერვისი დაინერგება და მოქალაქეებს კონსულტაციას დასაქმების კუთხითაც გაუწევენ.