საქართველოს რეგიონული განვითარებისა და ინფრასტრუქტურის მინისტრმა, მაია ცქიტიშვილმა, ქვემო ქართლში სახელმწიფო რწმუნებულის მოადგილე ზვიად ჭუნაშვილმა, მუნიციპალური განვითარების ფონდისა და ადგილობრივი ხელისუფლების ხელმძღვანელმა პირებმა, თეთრიწყაროსა და გარდაბნის მუნიციპალიტეტებში, საგანმანათლებლო ინფრასტრუქტურის მოწყობის მიმართულებით, მიმდინარე სამუშაოები დაათვალიერეს.

რეგიონის მასშტაბით, სახელმწიფო ბიუჯეტის დაფინანსებით, დაახლოებით 43 მილიონი ლარის ღირებულების 16 ახალი, მცირე და დიდ კონტიგენტიანი, სკოლების მშენებლობაა დაწყებული, ხოლო რეაბილიტაცია უტარდება 70-ს. შენდება 7 ახალი საბავშვო ბაღი და სხვადასხვა სახის სამუშაოები მიმდინარეობს, უკვე არსებულ, სააღმზრდელო დაწესებულებებში.

ასევე, გარდაბნის მუნიციპალიტეტში, ადგილობრივი ბიუჯეტის დაფინანსებით, აშენდა 5 საბავშვო ბაღი ისეთ სოფლებში, სადაც ამ დრომდე შესაბამისი ინფრასტრუქტურა არასდროს ყოფილა.

ქვემო ქართლის რეგიონში ვიზიტის ფარგლებში, ვიცე-პრემიერმა თეთრიწყაროსა და გარდაბნის მუნიციპალიტეტების წყალმომარაგების საკითხზე ისაუბრა - მისი თქმით, სოფლებში წყალმომარაგების კუთხით არსებული გამოწვევები ათწლეულების განმავლობაში არსებობს. თუმცა, ორივე მუნიციპალიტეტში, აღნიშნული მიმართულებით, მასშტაბური პროექტებია დაწყებული.

ამ დროისთვის, ქვემო ქართლში, გაერთიანებული წყალმომარაგების კომპანია ოთხ პროექტს ახორციელებს. აქტიურად მიმდინარეობს მარნეულის წყალარინების გამწმენდი ნაგებობის, მარნეულის წყალმომარაგება-წყალარინების სისტემების, ბოლნისის კოლექტორისა და წყალარინების სისტემის მშენებლობა. ასევე, გარდაბნის მუნიციპალიტეტის ხუთი სოფლის წყალმომარაგების I ეტაპის სამშენებლო სამუშაოები და ქალაქ მარნეულში, იალღუჯის დასახლებაში წყალსადენისა და წყალარინების გარე ქსელების მოწყობა.