ქვემო ქართლში სახელმწიფო რწმუნებულის მოადგილე, კახა კობერიძე რუსთავის ისტორიულ მუზეუმში საკრებულოს გენდერული თანასწორობის საბჭოს ორგანიზებით გამართულ ღონისძებას დაესწრო. „წარმატებული ქალები წარმატებული ქალაქისათვის“ - ღონისძიების ფარგლებში, გაიმართა პრეზენტაცია, სადაც საბჭოს თავმჯდომარე ნინო ქავთარაძემ ვრცლად ისაუბრა საკრებულოში მოქმედი გენდერული თანასწორობის საბჭოს საქმიანობისა და განსახორციელებელი პროექტების შესახებ.

ღია ცის ქვეშ მოეწყო იმ წარმატებული ქალების ფოტოების გამოფენა, რომლებმაც დიდი წვლილი შეიტანეს ქალაქ რუსთავის განვითარების პროცესში. 

საღამოზე, რომელსაც სხვადასხვა სფეროში მოღვაწე 50 ქალი ესწრებოდა, წარმოდგენილი იყო რუსთაველი ხელოვანი ქალბატონების მიერ, შექმნილი ხელნაკეთი, დეკორატიული ნივთები, სამკაულები, აქსესუარები და ფერწერული ტილოები.

ღონისძიებაზე იმყოფებოდნენ, რუსთავის მერი ირაკლი ტაბაღუა, თბილისის საკრებულოს წევრი და საქართველოს ადგილობრივ თვითმმართველობათა ეროვნული ასოციაციის (NALAG) ხელმძღვანელი პირები და ქვემო ქართლის რეგიონის შვიდივე მუნიციპალიტეტის გენდერული თანასწორობის საბჭოს წევრები და სამოქალაქო სექტორის წარმომადგენლები.