8 მაისს, რუსთავის დემოკრატიული ჩართულობის ცენტრში სკოლის უსაფრთხოებასთან დაკავშირებით კანონში შესატან ცვლილებებზე იმსჯელეს. 

საჯარო დისკუსიას საქართველოს პარლამენტში განათლების, მეცნიერებისა და კულტურის კომიტეტის თავმჯდომარე, მარიამ ჯაში, რუსთავის მაჟორიტარი დეპუტატი, გიორგი ბეგაძე, ქვემო ქართლში სახელმწიფო რწმუნებულის-გუბერნატორის მოადგილე, კახა კობერიძე, ქალაქის მერი, ირაკლი ტაბაღუა, რუსთავის საგანმანათლებლო რესურსცენტრის ხელმძღვანელი, თამარ ხეჩიკაშვილი, ადგილობრივი საჯარო სკოლის დირექტორები, შინაგან საქმეთა სამინისტროსა და მანდატურის სამსახურის წარმომადგენლები დაესწრნენ. 

შეხვედრის მიმდინარეობისას ყურადღება გამახვილდა იმ კონკრეტულ რეგულაციებზე, რომლებიც სკოლებში მანდატურის ინსტიტუტის მარეგულირებელი საკანონმდებლო ბაზის დახვეწისა და ახალი რეგულაციების შემოღების აუცილებლობას ითვალისწინებს. 

კანონპროექტის მიზანია, უფრო დამოუკიდებელი გახადოს მანდატურის ინსტიტუტი, უფრო მეტად უზრუნველყოს სკოლაში უსაფრთხო გარემო, შექმნას ინფორმაციის მიმოცვლისა და კოორდინაციის ბერკეტები განათლებისა და მეცნიერების სამინისტროს, მანდატურის სამსახურსა და შინაგან საქმეთა სამინისტროს შორის, ასევე, აღმოფხვრას ცალკეული სახის საკანონმდებლო ხარვეზები.

შეხვედრა კითხვა-პასუხის რეჟიმში წარიმართა, სადაც მონაწილეებმა კანონპროექტთან დაკავშირებით საკუთარი მოსაზრებები დააფიქსირეს.