რუსთავში, ღია დიალოგის ფარგლებში, ქვემო ქართლში სახელმწიფო რწმუნებული, შოთა რეხვიაშვილი, საქართველოს პარლამენტში რუსთავის მაჟორიტარი დეპუტატი, პაატა მხეიძე ქალაქის მერი, ირაკლი ტაბაღუა და ადგილობრივი ხელისუფლების სხვა წარმომადგენლები, რჩეულიშვილის, ნიკოლაძის, კლდიაშვილის, სპორტის ქუჩებისა და XII მიკრო-რაიონის მცხოვრებლებს შეხვდნენ.

ძირითად საჭიროებად მოსახლეობამ, საცხოვრებელი ფართებისა და მიწის ნაკვეთების დაკანონება, დასაქმების ხელშეწყობა და ეკოლოგიური მდგომარეობის გაუმჯობესება დაასახელა, ყურადღება გამახვილდა საზოგადოებრივი ტრანსპორტით მომსახურების სფეროში განსახორციელებელ ღონისძიებებზე. 

შეხვედრაზე, ხელისუფლების წარმომადგენლებმა, ადგილობრივ მცხოვრებლებთან ერთად, დიალოგის რეჟიმში განიხილეს 2020 წელს ქალაქში დაგეგმილი პროექტები.

ცენტრალური და ადგილობრივი ხელისუფლების დაფინანსებით, მიმდინარე წელს, რუსთავის მუნიციპალიტეტში 22 263 000 ლარზე მეტი ღირებულების, 97-მდე პროექტის განხორციელებაა გათვალისწინებული. ინფრასტრუქტურული პროექტების ფარგლებში, მიმდინარეობს ცენტრალური და შიდა გზების მოწესრიგება, იაღლუჯის მთის ფერდობზე, ღვარცოფსაწინააღმდეგო სანიაღვრე არხების მოწყობა, რეკრეაციული სივრცეების შექმნა, სასწრაფო სამედიცინო დახმარების ცენტრის მშენებლობა, სკოლების შენობების რეაბილიტაცია და სხვა პრიორიტეტული მიმართულებით განსახორციელებელი სამუშაოები.

აღსანიშნავია, რომ ხელისუფლების წარმომადგენლები, ღია დიალოგის ფარგლებში, მოსახლეობასთან შეხვედრებს, ქალაქის მასშტაბით, ეტაპობრივად გამართავენ.