22 ოქტომბერს, ქვემო ქართლის მასშტაბით, 287 წარჩინებულ მოსწავლეს, რომლებმაც განათლების საბაზისო კურსი უმაღლესი შეფასებით დაასრულეს, საჩუქრად პერსონალური კომპიუტერები გადასცეს.

მოსწავლეების დაჯილდოებაში მონაწილეობა ქვემო ქართლში სახელმწიფო რწმუნებულმა, შოთა რეხვიაშვილმა, გარდაბნის მუნიციპალიტეტის მერმა, რამაზ ბუდაღაშვილმა, საქართველოს განათლების, მეცნიერების, კულტურისა და სპორტის სამინისტროსა და ადგილობრივი ხელისუფლების წარმომადგენლებმა მიიღეს.

ღონისძიებას საგანმანათლებლო რესურს-ცენტრების ხელმძღვანელი პირები, საჯარო სკოლის დირექტორები, პედაგოგები და მოსწავლეები დაესწრნენ.

აღსანიშნავია, რომ რეგიონის მასშტაბით, მაღალი აკადემიური მოსწრების მქონე მოსწავლეების რაოდენობა მზარდია და სტატისტიკა, წლიდან-წლამდე, მნიშვნელოვნად უმჯობესდება.

პროექტი "ჩემი პირველი კომპიუტერი", საქართველოს განათლების, მეცნიერების, კულტურისა და სპორტის სამინისტროს ინიციატივით ხორციელდება, რომლის მიზანი მოსწავლეთა მოტივაციის ამაღლება და ინფორმაციულ-საკომუნიკაციო ტექნოლოგიებზე დაფუძნებული სწავლების მეთოდების გაძლიერებაა.