22-25 აგვისტოს, საერთაშორისო პროგრამა-ფესტივალი, ,,ერთიანი კავკასია“ ქართულ-პოლონური მხარისა და ევროკომიის დაფინანსება-მხარდაჭერით წელს, კვლავ მარნეულის მუნიციპალიტეტში გაიმართება. ქვემო ქართლის გუბერნატორი, შოთა რეხვიაშვილი მასშტაბური ღონისძიების დეტალებზე სასაუბროდ საორგანიზაციო ჯგუფის წევრებს შეხვდა. 

სახელმწიფო რწმუნებულის განმარტებით, სამხარეო ადმინისტრაცია მაქსიმალურად იქნება ჩართული ყველა საორგანიზაციო საკითხში, რაც ფესტივალის წარმატებით განხორციელებას უზრუნველყოფს. 

სამუშაო შეხვედრაზე მხარეებმა საერთაშორისო ღონისძიების სამომავლო პერსპექტივებზე ისაუბრეს, დაიგეგმა შეხვედრა მარნეულის მუნიციპალიტეტის მერთან.

აღსანიშნავია, რომ ფესტივალს ოთხი წლის განმავლობაში მარნეულის მუნიციპალიტეტის სოფელი წერაქვი მასპინძლობდა, გასულ წელს კი ღონისძიებები ბოლნისში გაიმართა. 

ფესტივალი ქვემო ქართლის რეგიონში ტრადიციულად სამი მეზობელი კულტურის საქართველოს, სომხეთის და აზერბაიჯანის კვეთაზე ტარდება და მსოფლიოს სხვადასხვა ქვეყნებიდან მუსიკოსებს, ხელოვანებს, ანიმატორებს, არქიტექტორებსა და მოხალისეებს აერთიანებს. 

ერთიანი კავკასიის მიზანია, რეგიონში არსებული ტურისტული პოტენციალის, ეთნო-კულტურული რესურსისა და გეოგრაფიული მდებარეობის გამოყენების გზით, ხელი შეუწყოს მულტიკულტურული ურთიერთობების გაღრმავებასა და ინტეგრაციის პროცესს.