ქვემო ქართლში სახელმწიფო რწმუნებულმა, შოთა რეახვიაშვილმა, საქართველოს დამოუკიდებლობის დღე მარნეულში ხელისუფლების წარმომადგენლებთან და ადგილობრივ მოსახლეობასთან ერთად აღნიშნა. 

სპეციალურად ამ დღესთან დაკავშირებით მუნიციპალიტეტში იმყოფებოდნენ ეკონომიკისა და მდგრადი განვითარების მინისტრი, ნათია თურნავა, შერიგებისა და სამოქალაქო თანასწორობის საკითხებში სახელმწიფო მინისტრის მოადგილე, ლია გიგაური,საქართველოს განათლების, მეცნიერების, კულტურისა და სპორტის მინისტრის მოადგილე, ლევან ხარატიშვილი. 

ცენტრალური და ადგილობრივი ხელისუფლების წარმომადგენლებმა ქალაქის მთავარ მოედანზე წარმოდგენილი სამხედრო ტექნიკა, სოფლის მეურნეობის პროდუქტებისა და ხელნაკეთი ნივთების პავილიონები და მუნიციპალიტეტში არსებული, კულტურული მემკვიდრეობის ძეგლების ფოტო-გამოფენა დაათვალიერეს, მოსახლეობას სცენიდან სიტყვით მიმართეს და საქართველოს დამოუკიდებლობის საიუბილეო თარიღი მიულოცეს. 

ღონისძიების ფარგლებში სტუმრებს შესაძლებლობა ქონდათ დაეგემოვნებინათ ქართული ღვინო, ტრადიციული კერძები და გაცნობოდნენ ,,ჩაის სახლის“ პავილიონში წარმოდგენილ ეთნო-კუთხეს. 

„ფაქტები და შედეგები“ – მარნეულის კულტურის სახლის მოსწავლეებმა ამ სახელწოდების თემატური თეატრალიზებული წარმოდგენით გააცოცხლეს სცენაზე საქართველოს ისტორიის ქრონიკები, მუსიკალური ნომრები შეასრულეს ადგილობრივმა შემოქმედებითმა კოლექტივებმა, მოეწყო სპორტული ასპარეზობები მკლავჭიდსა და ქართულ ჭიდაობაში. 

საზეიმო ღონისძიებებს მარნეულში ჯგუფი ,,მგზავრების“ კონცერტი და ფოიერვერკი დაასრულებს.

აღსანიშნავია, რომ 26 მაისი, საქართველოს დამოუკიდებლობის დღე, რეგიონის ყველა მუნიციპალიტეტში, მასშტაბური ღონისძიებებით აღინიშნა.