სახელმწიფო რწმუნებულის - გუბერნატორის ადმინისტრაცია

ბოლნისის, გარდაბნის, დმანისის, თეთრიწყაროს, მარნეულის, წალკისა და ქალაქ რუსთავის მუნიციპალიტეტებში

გერბი

Administration of State Representative - Governor

Bolnisi, Gardabani, Dmanisi, Tetritskaro, Marneuli, Tsalka and Rustavi municipalities

ანონსი


ანონსი
  • ტოლერანტობის საერთაშორისო დღისადმი მიძღვნილი კვირეული ქვემო ქართლში

ქვემო ქართლში სახელმწიფო რწმუნებულის-გუბერნატორის ადმინისტრაციის ინიციატივითა და მხარდაჭერით რეგიონში, ტოლერანტობის საერთაშორისო დღისადმი მიძღვნილი კვირეული აღინიშნება:

  • თეთრიწყარო

 13 ნოემბერს ტოლერანტობის საერთაშორისო დღესთან დაკავშირებით მუნიციპალიტეტის გამგეობის ორგანიზებით ქ.თეთრიწყაროში, ააიპ ,,თეთრიწყაროს მხარეთმცოდნეობის მუზეუმში“  17:00 სთ-ზე გაიმართება ლიბანელი რეჟისორის ნადინე ლაბაკის - კანის ფესტივალის და სხვა მრავალი საერთაშორისო ფესტივალის გამარჯვებული ფილმის ,,ეხლა საით წავიდეთ“ ჩვენება და დისკუსია.

ასევე, სტუმრებს შესაძლებლობა ექნებათ, ადგილზე დაათვალიერონ გამოფენა ,,მრავალფეროვანი თეთრიწყარო“,  რომელიც ასახავს მუნიციპალიტეტში სხვადასხვა კულტურის წარმომადგენელ ხალხთა საუკუნოვან და მშვიდობიან თანაცხოვრებას.

  • დმანისი

14 ნოემბერს ტოლერანტობის დღის აღსანიშნავად  ააიპ „დმანისის კულტურის დახელოვნების ცენტრი“ ამავე სამსახურის ფოიეში მოაწყობს ხატვისა და ხალხური რეწვის სხვადასხვა ეროვნების ბავშვთა ნამუშევრების გამოფენას. ღონისძიებაში ასევე მონაწილეობას მიიღებენ ქალთა ფოლკლორული ანსამბლი „ირინოლა" და ინტერნაციონალური ანსამბლი ,,დმანისური აისი”. ქართველი და ეთნიკური უმცირესობების წარმომადგენლები წაიკითხავენ ლექსებს. 

  • ბოლნისი

15 ნოემბერს 15:00 საათზე ბოლნისის კულტურის სახლის მიმდებარე ტერიტორიაზე გაიმართება კოსტუმირებული პერფორმანსი სხვადასხვა ქვეყნის ნაციონალური სამოსით, მოსწავლეების მიერ მოიხატება   ასფალტი (ხატვის წრის  მოსწავლეები), რომელიც იქნება ტოლერანტობის თემატიკასთან დაკავშირებული.

ამასთან ერთად, ღონისძიებაში ჩართული იქნებიან, როგორც ეთნიკური უმცირესობის წარმომადგენელი მოსწავლეები (ნახიდურის საჯარო სკოლის 15 აზერბაიჯანელი მოსწავლე, პედაგოგი მარინა ბჟალავა), ასევე შშმ პირები (დათო რეხვიაშვილი).

ფლიფჩარტის ქაღალდებზე  გაკეთდება წარწერები ქართულ და აზერბაიჯანულ  ენებზე.

  • წალკა

16 ნოემბერს წალკის მუნიციპალიტეტში ტოლერანტობის საერთაშორისო დღესთან დაკავშირებით გაიმართება კულტურული და სპორტული ღონისძიებები ეთნიკური უმცირესობების მონაწილეობით.

12:00 საათზე ღონისძიებას გახსნის წალკის მუნიციპალიტეტის კულტურის ცენტრთან არსებული ბავშვთა ქორეოგრაფიული ანსამბლი „თაობა“.

12:30 საათზე ღონისძიებას შემოუერთდება სომხური ცეკვის ანსამბლი „ნარდევანი“ და საესტრადო წრის აღსაზრდელები „მტრედები“.

12:30 საათზე პარალელურად სასპორტო სკოლისა და კულტურის ცენტრის შენობებში გაიმართება სპორტული ღონისძიება ჭადრაკში და ხელნაკეთი ნამუშევრების გამოფენა.

  • გარდაბანი

17 ნოემბერს 15:00 საათზე ქ.გარდაბნის კულტურის სახლში ააიპ გარდაბნის მუნიციპალიტეტის კულტურის ცენტრი და ააიპ მოსწავლე-ახალგაზრდობის ცენტრი  აღნიშნავს ტოლერანტობის დღეს.

ქალაქ გარდაბნის კულტურის სახლში მოეწყობა ფერწერული ნამუშევრების  გამოფენა და მცრე სცენაზე გაიმართება გარდაბანში მცხოვრები ქართველი, სომეხი, აზერბაიჯანელი, ასირიელი, უკრაინელი, რუსი ბავშვების მონაწილეობით კონცერტი.

  • მარნეული

18 ნოემბერს, 15:00 საათზე, მარნეულის მუნიციპალიტეტის საჯარო ბიბლიოთეკაში ეთნიკურად ქართველი, სომეხი და აზერბაიჯანელი 20 ახალგაზრდა შემდეგ აქტივობებს ჩაატარებს:

როლური თამაში;

ახალგაზრდებს ვაძლევთ დავალებას:

წარმოიდგინონ, რომ მოხვდნენ უკაცრიელ კუნძულზე და დაღამებამდე უნდა ააგონ თავშესაფარი. მათ საშუალება აქვთ გამოიყენონ კუნძულზე(ოთახში) არსებული ყველა რესურსი. ამავდროულად, მათ ვაძლევთ გარკვეულ როლებს.

ახალგაზრდებს ეძლევა მითითება, ააშენონ თავშესაფარი და მოიქცნენ ისე, როგორც რეალურ ცხოვრებაში მოიქცეოდნენ.

დისკუსია;

დავალების დასასრულს გაიმართება დისკუსია, როგორ გრძნობდნენ თავს ისინი დავალების შესრულებისას, რა დამოკიდებულებას გრძნობდნენ ჯგუფის სხვა წევრების მხრიდან?

შემდგომ ვთხოვთ მათ, ნახონ თავიანთი როლები.

შედეგი: ახალგაზრდები უფრო ნათლად გაიაზრებენ, რას ნიშნავს დისკრიმინაცია ამა თუ იმ ნიშნით;

პრეზენტაცია;

სლაიდ–შოუს გამოყენებით ახალგაზრდებს მიეწოდებათ ინფორმაცია ტოლერანტობის, სტერეოტიპული აზროვნებისა და სიძულვილის ენის შესახებ.

პოსტერი: არა სიძულვილს;

ახალგაზრდები ერთად მოხატავენ პოსტერს, ლოზუნგით: „არა სიძულვილს!“

პოსტერი განთავსდება ბიბლიოთეკის ერთ–ერთ კედელზე.

  • რუსთავი

19 ნოემბერს კვირეულის ფარგლებში რუსთაველი მხატვრების თემატური გამოფენა გაიმართება გიგა ლორთქიფანიძის სახელობის სახელმწიფო თეატრის ფოიეში; დამთვალიერებელი ორკესტრის მიერ შესრულებული მუსიკალური ნაწარმოებების ფონზე დაათვალიერებს ნამუშევრებს.

პარალელურად, შერიგებისა და სამოქალაქო თანასწორობის საკითხებში სახელმწიფო მინისტრის აპარატის ორგანიზებით თეატრის სცენაზე გაიმართება კონცერტი.